1
യഹോവേ, എന്റെ വാക്കുകള്ക്കു ചെവി തരേണമേ; എന്റെ ധ്യാനത്തെ ശ്രദ്ധിക്കേണമേ;
2
എന്റെ രാജാവും എന്റെ ദൈവവുമായുള്ളോവേ, എന്റെ സങ്കടയാചന കേള്ക്കേണമേ; നിന്നോടല്ലോ ഞാന് പ്രാര്ത്ഥിക്കുന്നതു.
3
യഹോവേ, രാവിലെ എന്റെ പ്രാര്ത്ഥന കേള്ക്കേണമേ; രാവിലെ ഞാന് നിനക്കായി ഒരുക്കി കാത്തിരിക്കുന്നു.
4
നീ ദുഷ്ടതയില് പ്രസാദിക്കുന്ന ദൈവമല്ല; ദുഷ്ടന് നിന്നോടുകൂടെ പാര്ക്കയില്ല.
5
അഹങ്കാരികള് നിന്റെ സന്നിധിയില് നില്ക്കയില്ല; നീതികേടു പ്രവര്ത്തിക്കുന്നവരെയൊക്കെയും നീ പകെക്കുന്നു.
6
ഭോഷ്ക്കുപറയുന്നവരെ നീ നശിപ്പിക്കും; രക്തപാതകവും ചതിവുമുള്ളവന് യഹോവെക്കു അറെപ്പാകുന്നു;
7
ഞാനോ, നിന്റെ കൃപയുടെ ബഹുത്വത്താല് നിന്റെ ആലയത്തിലേക്കു ചെന്നു നിന്റെ വിശുദ്ധമന്ദിരത്തിന്നു നേരെ നിങ്കലുള്ള ഭക്തിയോടെ ആരാധിക്കും.
8
യഹോവേ, എന്റെ ശത്രുക്കള്നിമിത്തം നിന്റെ നീതിയാല് എന്നെ നടത്തേണമേ; എന്റെ മുമ്പില് നിന്റെ വഴിയെ നിരപ്പാക്കേണമേ.
9
അവരുടെ വായില് ഒട്ടും നേരില്ല; അവരുടെ അന്തരംഗം നാശകൂപം തന്നേ; അവരുടെ തൊണ്ട തുറന്ന ശവക്കുഴിയാകുന്നു; നാവുകൊണ്ടു അവര് മധുരവാക്കു പറയുന്നു.
10
ദൈവമേ അവരെ കുറ്റംവിധിക്കേണമേ; തങ്ങളുടെ ആലോചനകളാല് തന്നേ അവര് വീഴട്ടെ; അവരുടെ അതിക്രമങ്ങളുടെ ബഹുത്വംനിമിത്തം അവരെ തള്ളിക്കളയേണമേ; നിന്നോടല്ലോ അവര് മത്സരിച്ചിരിക്കുന്നതു.
11
എന്നാല് നിന്നെ ശരണംപ്രാപിക്കുന്നവരെല്ലാവരും സന്തോഷിക്കും; നീ അവരെ പാലിക്കുന്നതുകൊണ്ടു അവര് എപ്പോഴും ആനന്ദിച്ചാര്ക്കും; നിന്റെ നാമത്തെ സ്നേഹിക്കുന്നവര് നിന്നില് ഉല്ലസിക്കും;
12
യഹോവേ, നീ നീതിമാനെ അനുഗ്രഹിക്കും; പരിചകൊണ്ടെന്നപോലെ നീ ദയകൊണ്ടു അവനെ മറെക്കും;
